سياسة الخصوصية

1. بنجمع إيه

بيانات الحساب (الاسم، الإيميل، الموبايل، الدولة، المحافظة)، وملفك، وخدماتك، ومشاريعك، وعروضك، ورسايلك والملفات اللي بترفعها، والعقود والمدفوعات والتحويلات (ومنها حساب السحب اللي بتكتبه)، والتقييمات، وبيانات تقنية بسيطة زي عنوان الـ IP للأمان وتحديد معدلات الاستخدام.

لو أكدت رقمك القومي، بنتحقق منه ونحتفظ بالبيانات المستنتجة بس (السن والمحافظة والنوع)؛ الرقم نفسه مش بيتحفظ أبدًا.

2. مش بنجمع إيه

بيانات الكارت. الدفع بيتم عن طريق شريك دفع مرخّص (باي موب) على صفحاته؛ ونيون مش بيشوف ولا بيحفظ رقم كارتك.

3. بنستخدمها في إيه

لتشغيل المنصة: الترشيحات، والعقود، والضمان، والتحويلات، والفواتير والسجلات الضريبية، والدعم، ومنع الاحتيال والأمان (زي التنبيه على طلبات الدفع برّه المنصة)، والإشعارات اللي بتختار توصلك.

مميزات الذكاء الاصطناعي الاختيارية (كتابة المشاريع والعروض، والترشيحات، وملخص التقييمات) بتبعت النص المطلوب لمزوّد الذكاء الاصطناعي (Anthropic) علشان يطلّع النتيجة؛ ومش بيتستخدم لعمل ملفات إعلانية.

4. بنشاركها مع مين

الطرف التاني في عقدك بيشوف اللي محتاجه للشغل. ومزودي خدمات بيعالجوا البيانات بالنيابة عننا: Vercel (الاستضافة، فرانكفورت)، وNeon (قاعدة البيانات)، وResend (الإيميل)، وباي موب (الدفع)، وAnthropic (الذكاء الاصطناعي)، وPostHog (تحليلات استخدام المنتج، في أوروبا، برقم حساب داخلي فقط، من غير اسمك أو بيانات التواصل). ومش بنشارك بيانات مع جهات رسمية غير لما القانون يطلب. ومش بنبيع البيانات الشخصية.

5. بنحتفظ بيها قد إيه

طول ما حسابك مفتوح. لما تمسح حسابك، بنمسح بياناتك الشخصية ونحتفظ بالعقود والمدفوعات والفواتير من غير اسمك المدة اللي تطلبها قوانين الضرائب والمحاسبة.

6. حقوقك

حسب قانون حماية البيانات الشخصية المصري (١٥١ لسنة ٢٠٢٠) تقدر توصل لبياناتك وتصححها وتمسحها. نزّل نسخة أو امسح حسابك من الملف الشخصي ← الخصوصية والبيانات، وغيّر إيميلات الإشعارات من ملفك، أو كلّمنا في أي حاجة تانية.

7. الكوكيز

بنستخدم الكوكيز الأساسية بس: جلسة الدخول، واللغة، وكود الدعوة لو جيت من رابط دعوة. مفيش كوكيز إعلانات أو تتبع.